Samtök atvinnurekenda á Reykjanesi gera svakaleg mistök

Ég rakst á þetta myndband sem gert var fyrir SAR á youtube.

Þarna gefa samtökin í skyn að ekkert sé hægt að gera og allt vonlaust vegna þess að ekkert er gert fyrir þá.

Ef ég væri að fara að stofna fyrirtæki þá myndi ég ekki vilja stofna það á Suðurnesjum.

Með þessu myndbandi eru menn að eyðileggja ímynd þeirra sjálfra.

Þeir eru vonlausir og sjá allt svart vegna þess að nokkur fyrirtæki hafa ekki rekstrargrundvöll nema með íhlutun ríkisins.

Þetta eiga engin samtök að gera sama hversu slæmt ástandið er.

Það á alltaf að horfa á það jákvæða sem er að gerast og auglýsa það en ekki fílupúka og fílupúkasamtök sem skæla og sjá ekki tækifærin fyrir því.

Næst verður vonandi gert bjart og skemmtilegt myndband sem höfðar til fjárfesta.

Árni Sigfússon er góður í þessu myndbandi og ætti SAR að taka hann til fyrirmyndar.

Vakinn, nýtt umhverfiskerfi í ferðaiðnaði

Vakinn er nýtt gæða- og umhverfiskerfi fyrir ferðaiðnaðinn.

Líklega hafa flestir í ferðaiðnaðinum kynnt sér Vakann.

Það getur ekki talist gott fyrir ímynd Íslands að heyra að Ísland er neyslufrekasta þjóð í heimi.  Það passar ekki inn í hugmyndir fólks um hreina náttúru og sjálfbæra þróun.

Það er því mikilvægt fyrir ferðaiðnaðinn að Íslendingar geri eitthvað í sínum málum.

Ég er mjög ánægður með Vakann, það er stórt skref í áttina að því að gera ferðaiðnaðinn að sjálfbærum iðnaði.

Umhverfiskerfi Vakans hefur þrjú viðmið, brons, silfur og gull.  Þannig að fyrirtæki þurfa ekki strax að breyta öllu hjá sér strax til þess að hljóta umhverfisvottun Vakans. 

Ég tel að eftir einhver ár geti það verið orðin lagaleg skylda að uppfylla ákveðin skilyrði í Vakanum.  Þess vegna hvet ég öll fyrirtæki í ferðaiðnaðinum að taka þátt í Vakanum og setja sér stefnu í umhverfismálum.

Það sem mér finnst einnig merkilegt við Vakann, er að hann hefur siðareglur.  Allir þeir sem vilja taka þátt  þurfa að samþykkja siðareglurnar. 

Það getur orðið öðrum atvinnugreinum til eftirbreytni.

Eftirfarandi myndband getur gefið þér hugmynd um hverju þú getur breytt hjá þér.

Íslendingar neyslufrekasta þjóðin

Uppreisn hóteleigenda gegn bókunarsíðum

Fjöldi hóteleiganda hafa skráð hótelin sín á bókunarsíðum eins og hrs.com eða booking.com.

Þetta hefur borgað sig fyrir hótelin því ansi margir bóka herbergin sín í gegnum bókunarsíður.  Það er einfalt og fljótlegt.

Eigendur bókunarsíðanna hafa tekið eftir því hversu mikilvægar síðurnar eru fyrir hótelin.  Þess vegna hafa þau, í krafti þessa, hækkað þóknunina fyrir þjónustuna.  Fyrir nokkrum árum þurfti hótel að greiða 10% þóknun en í dag er hún komin í 15% af heildarkostnaði gistingarinnar.

Margir hóteleigendur hafa kvartað og sum hafa kært eigendur bókunarsíðanna.  Það hefur engan árangur borið.

Þeir sem hafa hugsað í lausnum hafa komið með þær.

Í janúar á þessu ári opnuðu nokkrar af stærstu hótelkeðjum Bandaríkjanna eigin bókunarsíðu sem heitir roomkey.com.

Í Þýskalandi stofnaði nýlega hóteleigandinn Günther Uhlmann bókunarsíðuna www.ohne-umweg-buchen.de.

Á báðum þessum vefsíðum er hægt að leita að hóteli og svo er bókað á heimasíðu hótelsins en ekki á vefsíðunni sjálfri.

Það er spurning um að prófa þessar síður næst þegar þú bókar hótelherbergi.  Það er betra að hótelið fái tekjurnar en "óþarfa" milliliðir, eða?

Bókunarsíður mjög góðar, þrátt fyrir að þær taki háa þóknun. Ég mæli með því að hótel skrái sig. 

www.ahgz.de fjallar um þetta í dag.

Hótel og gististaðir: Vökva með rigningarvatni

Það er langþægilegast að vökva með vatni sem kemur með leiðslum langar leiðir.

Vökvun á gróðri þarf ekki endilega að vera hátt hlutfall af vatnsnotkun.

En hvernig væri að koma upp safnaðstöðu fyrir rigningarvatn og vökva gróðurinn með uppsöfnuðu rigningarvatni.  Nóg rignir á Íslandi.

Það gæti verið áhugavert að bera svo saman vatnsnotkun á milli ára.

Margt smátt gerir eitt stórt og einhvers staðar þarf að byrja.

Þetta myndband gæti gefið þér hugmyndir hvernig þú getur nýtt þér rigningarvatn:

Getur ferðaiðnaður haft tekjur af haustlaufi?

Er hægt að byggja upp ferðaiðnað á því að bjóða ferðamönnum upp á að skoða haustlaufin á trjánum?

Myndir þú fara í sér ferðalag, keyra í nokkra klukkutíma eða fljúga, aðeins til þess að skoða gulnuð lauf?

Þegar við hugsum um ferðaiðnað kemur oft í huga okkar stöðluð ímynd.  Við teljum okkur alltaf vita hvað selur og hvað ekki.

Það hefur komið mikið fram í umræðunni um Nubo og Grímsstaði.  Margir fullyrða að hann geti ekki byggt upp ferðaþjónustu á svæðinu því þar er ekkert sem hægt er að selja ferðamönnum.

Þetta er stór fullyrðing en byggir á reynslu þess sem þetta fullyrðir.

En aftur að laufunum.

Mörg hótel og gististaðir í Bandaríkjunum er full af ferðamönnum sem koma aðeins í þeim tilgangi að skoða lauf. 

Gulnuð lauf eru tekjulind í ferðaþjónustu.  Tauck Tours er ein þeirra ferðaskrifstofa sem býður sérstakar ferðir til að skoða laufin.

Opnum hugann og finnum tækifæri.

Ég fékk einu sinni símhringingu þegar ég starfaði í Bandaríkjunum og varð spurður hvernig laufin væru.  Ég hef sjaldan orðið eins hissa á ævinni.  Ég horfði ekki út fyrir kassann þá.

Hér er myndband af gulnuðum laufum á Nýja-Englandi.

Margfeldisáhrif ferðaiðnaðarins eru augljós

Þessi frétt er gott dæmi um þá þjónustu sem ferðaiðnaðurinn þarf frá fyrirtækjum sem er ótengd ferðaiðnaðinum.

Bílasala selur bifreiðar til bílalaleigu.  Svo þarf að hugsa um alla þá þjónustu sem bifreiðarnar þurfa á meðan bílaleigan er með bifreiðarnar í rekstri.

Bensínstöðvar munu einnig njóta góðs af þessu, sérstaklega á landsbyggðinni.

Svo selur bílalaleigan bifreiðarnar og þá fá einhverjir að kaupa góða bíla á "góðu" verði.

Þetta er aðeins eitt lítið dæmi.  Það eru fjöldamörg önnur.

Margfeldisáhrif ferðaiðnaðarins eru því augljós fyrir allt hagkerfið.

Ég fann ekkert auglýsingamyndband frá Hertz á Íslandi á youtube þannig að ég setti þetta inn frá Blue Car Rental. 

Hertz kaupir 422 nýja bíla

Notkun snjallsíma í ferðaiðnaði

Sífellt fleiri nota snallsíma og spjaldtölvur í dag.

Þess vegna er nauðsynlegt fyrir ferðaiðnaðinn að skoða möguleika þess að bjóða upp á snjallforrit eða "app" til þess að kynna þjónustu sína.

Í dag er hægt að bóka borð á veitingastað, panta hótel og jafnvel bóka flug með snjallsíma eða spjaldtölvu og smáforriti.

Stærsti hluti þeirra sem ferðast til Íslands kynna sér möguleika og þjónustu á netinu.

Næsta skref er að bjóða þessum einstaklingum að hlaða niður smáforriti af netinu.

Þá geta einstaklingar skoðað þjónustuna hvar sem það er statt ef það er með snjallsíma eða spjaldtölvu.

Þau fyrirtæki sem byggja á ferðaþjónustu geta sameinast um snjallforrit.  Þá geta ferðamennirnir séð alla þá þjónustu sem til er á tilteknu svæði. 

Það myndi auka möguleikann á því að verðandi ferðamenn kæmu á staðinn.

Ég læt fylgja með kynningu á snjallforriti frá Ungverjalandi. 

Óvart fleiri ferðamenn

Það koma ekki óvart fleiri ferðamenn til landsins.

Það hefur verið unnin alveg gríðarlega mikil vinna við að fá fleiri ferðamenn til landsins.

En við sjáum það ekki því auglýsingarnar og kynningin er ekki á Íslandi.

"Come and be Inspired by Iceland" átakið sem fór af stað þegar Eyjafjallajökull fór að gjósa hefur skilað mjög miklu.

Á þeim 14 árum sem ég hef verið erlendis þá hef ég tekið eftir því að fólk í kringum mig talar ekki aðeins um að vilja fara til Íslands.  Það hefur kannað möguleikann á því á netinu og sumir hafa meira að segja gengið alla leið og bókað ferð til Íslands.

Ísland er orðið að þekktu ferðamannalandi.

Það segir okkur að við verðum að halda áfram á Íslandi að gera landið "ferðamannahæft".  Það er að undirbúa landið undir þann fjölda sem kemur.  Það eru margar náttúruperlur sem geta ekki haft undan öllum þessum ferðamannastraumi.

En ég er mjög bjartsýnn á framtíðina.

Vakinn, nýtt átak ferðaþjónustunnar í gæðamálum og umhverfisvernd, er einn liður í þessum undirbúningi.

Svo eru ókeypis auglýsingar einnig góðar:

Mikil fjölgun ferðamanna

Ferðaiðnaður: Áhugavert myndband, en hvað er verið að selja?

Ég rakst á áhugavert myndband hjá Visit Iceland.

Það er minnst á Reykjavík, en hvað annað?

Er ekki kominn tími til að selja allt landið og minnast á það í öllum myndböndum hvaðan myndirnar eru teknar og í lok myndbandsins að koma með upplýsingar hvernig hægt er að nálgast þessa staði og viðburði á netinu. 

Þannig getum við auðveldað verðandi ferðamönnum að skipuleggja ferð um allt landið sem er ekki einungis bundin við Reykjavík.  

Hvað finnst þér?

Ferðaiðnaður: Stykkishólmur og sjálfbær þróun

Ég ætla ekki að skrifa mikið í þessari færslu.

Ég er með myndband um Stykkishólm og ferðaiðnaðinn.  Það sýnir í raun og veru hversu einfalt það er og spennandi að bjóða ferðamönnum upp á það sem er þegar til á svæðinu.  

Það þarf ekki alltaf að búa til eitthvað nýtt heldur uppgötva hvað svæðið hefur upp á að bjóða.  Það er mest spennandi. 

Stykkishólmur fékk EDEN verðlaunin í fyrra og er því gæðaáfangastaður Íslands árið 2011.  En hér er hægt að lesa meira um EDEN verkefnið, en það er á vegum ESB.  Meira að segja búið að þýða kaflann um Stykkishólm á íslensku.

Það ættu öll sveitarfélög að læra af Stykkishólmi.  Best að hringja strax á morgun og spyrja hvað þarf að gera.  

Stykkishólmur sýnir einnig að allir eiga að taka þátt, eða hafa möguleika á því að taka þátt.  Það er í raun númer eitt.